सिन्धपाल्चोक घर भई भक्तपुरको सूर्यविनायक नगरपालिका–४ सुवर्णेश्वर चुनदेवीनजिकै कृष्णहरि छिमीको घरमा डेरा गरी बस्ने वर्ष ४७ को रुकबहादुर लामिछाने सोही घरको कम्पाउन्डमा रहेको इनार अगाडिको हिलोमा मंगलबार मृत अवस्थामा फेला परेको हो ।भक्तपुर, ८ पुस । भक्तपुरको सूर्यविनायक र लोकन्थलीमा हिलोमा घोप्टो परेर मृत अवस्थामा दुईवटा शव फेला परेको छ ।
त्यसैगरी मध्यपुरथिमि नगरपालिका–१७ लोकन्थलीस्थित राममन्दिरनजिकैको पानीले भरिएर दह बनेको सिममा महोत्तरी हात्तीवन–१ घर भई बालकोट बस्ने वर्ष ३१ को पावेल घिमिरेको शव फेला परेको छ ।
प्रहरीले दुईवटै शवलाई शवपरीक्षणका लागि शिक्षण अस्पताल महाराजगन्ज पठाएको महानगरीय प्रहरी परिसर भक्तपुरका प्रहरी प्रवक्ता एवम् प्रहरी नायब उपरीक्षक शेखर खनालले जानकारी दिनुभयो ।
दुवै जनाको मृत्युको कारण रहस्यमय भएकाले अनुसन्धान अगाडि बढाएको उहाँले जानकारी दिनुभयो ।
भीरबाट लडेर सशस्त्र प्रहरीको मृत्यु
दार्चुलामा एक सशस्त्र प्रहरीका एक जवानको भीरबाट लडेर मुत्यु भएको छ । मृत्यु हुनेमा दार्चुला धारी–२ फाराका २८ वर्षीय ग्रिस कुँवर रहेका निमित्त प्रहरी प्रमुख प्रहरी निरीक्षक गोपीकृष्ण सुवेदीले बताउनुभयो ।
नवलपरासीमा कार्यरत मृतक जवान स्थानीय फारभिटा भन्ने भीरबाट लडेर मृत्यु भएको जिल्ला प्रहरी कार्यालय दार्चुलाले जनाएको छ ।
बिदामा घर आएका जवान घरबाट कार्यक्षेत्र जाँदै गरेका पारिवारिक स्रोतले बताएको छ । मृतकको शव मंगलबार शव परीक्षण गरी आफन्तको जिम्मा लगाएको प्रहरीले जनाएको छ । मृतक कुँवरका एक छोरा तथा श्रीमती रहेका छन् ।
