काठमाडौंमा चाल्नाखेलमा रहेको एभरेष्ट ग्यासमा झडप हुदाँ डिएसपीको पेस्तोल हराएको छ । किर्तिपुर वृृतका डिएसपी टीकाबहादुर केसीले बोकेको हतियार स्थानीयले खोसेका हुन् । केसीले बोकेको चाइनिज मिनि पेस्तोलमा ७ राउण्ड गोली लोड भएको अवस्थामा थियो ।
ग्यास नपाएको भन्दै आन्दोलनमा उत्रिएका स्थानीय तोडफोडमा उत्रिएपछि प्रहरीले प्रतिकार गर्दा डिएसपीको पेस्तोल हराएको एसपी विश्वराज पोखरेलले जानकारी दिए । अहिले सो क्षेत्रमा प्रहरी निगरानी बढाइएको छ ।
सो क्षेत्रमा प्रहरी परिचालन गरिनुका साथै चेकजाँच भइरहेको एसएसपी विक्रमसिंह थापाले जानकारी दिए । पेस्तोल हराएको अपरान्ह सवा ४ बजे घटना भएको ३ घन्टा हुदाँ समेत फेला परेको छैन् । एसपी पोखरेलले स्थानीयले प्रहरीमाथि गुरिल्ला शैलीमा आक्रमण गरेको बताए । जंगलतर्फको भिरजस्तो स्थानबाट एक हजारभन्दा बढीले ढुंगामुडा गरेको उनले बताए । स्थानीयको ढुंगा लागेर डिएसपी केसी र रेवती ढकाल घाइते भएका छन् ।
